Балабақша қызметкері 18 миллион теңге жымқырды

Сауықтыру кешендерінің бірінде істейтін қызметкер 18 миллион теңгені заңсыз меншіктеп алған.  

Бұл туралы Қостанай облысының прокуратурасы хабарлады. 

Рудныйдағы «балалар тәрбиелеу-сауықтыру кешені» мемлекеттік кәсіпорнын тексеру кезінде прокурорлар аса ірі мөлшерде ақша ұрлау фактісін анықтады.

«Балалар кешенінің қызметкері 2022-2023 жылдар аралығында 18 миллион теңге ақшаны заңсыз иемденгені анықталды. Ол қаражат жазғы маусымға балалар сауықтыру орталықтарына жолдама сатып алған азаматтардан келген» деп хабарлады қадағалау органы.

Қылмыстық іс сотқа жіберілді. Сауықтыру кешені қызметкерінің мүлкі тәркіленді. Күдіктіге 12 жылға дейін бас бостандығынан айыру мәселесі төніп тұр.