Бақытжан Базарбек: Үкімет тарифті өсірсе — халықтың қалтасы көтермейді

Депутат Бақытжан Базарбек  мәжіліс дәлізінде Ботагөз Омарованың ісі мен коммуналдық төлемге енгізілген мораторий  туралы журналистердің сұрағына жауап берді, деп хабарлайды Orda.kz.

Еске салсақ, қазақстандық журналистер  Ботагөз Омарованың ісіне байланысты Тоқаевқа үндеу жасаған болатын. Ботагөз полиция бөлімінде сегіз сағаттан астам уақыт болып, 21 наурызға қараған түні, сағат 01:00 шамасында тергеу соты өтіп, оның қорытындысы бойынша Ботагөз Омароваға екі ай мерзімге үйқамақ түріндегі бұлтартпау шарасы тағайындалды. Ал түнгі сағат 03:00-ден 05:00-ке дейін полиция оның пәтерінде тінту жүргізді.

«Ботагөз Омарованың ісінде шындық ашылады, заң тұрғысынан дұрыс бағаланатын болады. Себебі, ол үшін кепілгер болған адамдар бар, оның ішінде мен де бармын. Оның тергеу органдары нұсқамаларын қатаң сақтап, ешқайда қашып кетпейтініне, іске жауапкершілікпен қарап, құзырлы органдардың тергеуіне уақтылы қатысып, дер кезінде жауап беретініне сенімдімін», — деді ол. 

Сонымен қатар журналистің «бұны әдейі істелген арнайы тапсырма деп ойламасыз ба?» деген сұрағына да жауап берді.

«Жоқ, мен мұны арнайы тапсырма деп ойламаймын. Әр істің өз ерекшеліктері болады, сондықтан бәрін заң аясында  ғана қарастырып, әр айыпталған адам өзін қоғауы керек. Себебі мұндай айып кез-келген адамға тағылмайды», — деді Базарбек. 

Қазақстан Республикасының «Масс-медиа туралы» заңына сәйкес, журналистер мен бұқаралық ақпарат құралдарының  шындыққа сәйкес келмейтін ақпарат таратқаны үшін бірқатар жағдайда жауапкершіліктен босатылады. Атап айтқанда, егер ақпарат жеке және заңды тұлғалардың сөзін дәл келтірсе немесе ресми дереккөздерден алынса, жауапкершілік жүктелмейді.

Сонымен қатар,  депутат  бүгін 1 сәуір күні коммуналдық төлемдер мен жанар-жағармай бағасының көтерілмеуіне  берілген мораторий күшін жойғанына қатысты, тарифтер көтеріліп кетпей ме, деген сұраққа да жауап берді.

«Бұл бүгінгі күнде ең маңызды тақырыптардың бірі. Коммуналдық төлемдерге арналған тарифке  мораторийді ұзарту қажет. Біз бұл туралы депутаттық сауал жолдадық, сондықтан күте тұрайық. Дегенмен баға шарықтап кетпейді деп ойлаймын. Құзырлы органдар одан әрі қалай жұмыс істейтіндері туралы жоспарымен бөлісуі керек. Онсыз да тарифтер өте жоғары одан әрі көтерілсе — халықтың қалтасы көтермейді», — деді ол. 

Депутат үкімет жақын арада тарифтерді көтеру туралы мәселе қозғамауы тиіс деп ойлайтынын жеткізді. 

Еске салсақ, Қазақстанда коммуналдық қызметтердің (жылу, электр, су, кәріз, газ) тарифтерін көтеруге енгізілген мораторий 2026 жылдың наурыз айының соңында аяқталды.

Бірақ бағаның нақты өсуі маусымнан ерте болмайды, себебі жеткізушілердің өтінімдерін қарау 40-тан 90 күнге дейін созылады. Ал кейбір сарапшылардың пікірінше тарифтер бірден өспейді, компаниялардың өтінімдері мен есептері негізінде әр сала жеке қаралатын болады.

Оқи отырыңыз:

• Ботагөз Омарованың ісі бойынша журналистер Тоқаевқа үндеу жасады, Балаева пікір білдірді
• Астанада журналист Ботагөз Омароваға қатысты қылмыстық іс қозғалды
• Ермұрат Бәпи: Өз әйелін хайуан ұқсатып, сыйға беру - қылмыс