Астанада жеңіл атлетикадан Қазақстанның қысқы чемпионаты басталды

10 қаңтар 2026 16:03 Ләззат Сұңқар

Фото: olympic.kz

Алғашқы нәтижелер жарияланды.

9 қаңтар күні елордадағы Qazaqstan жеңіл атлетика кешенінде жеңіл атлетикадан Қазақстанның XXXV қысқы чемпионаты өз жалауын көтерді. Жарыстың алғашқы күні медальдардың алғашқы жиынтығы сарапқа салынды, деп хабарлайды Orda.kz.

Әйелдер арасында 1500 метр қашықтықта Шығыс Қазақстан облысының намысын қорғап жүрген әлем чемпионы Нора Джеруто Тануи жеңіске жетті. Күміс жүлдені алматылық Дарья Миллер, қола жүлдені Жетісу облысынан келген Аяна Болатбекқызы иеленді.

Әйелдер арасында 400 метрге жүгіруде Аделина Земс (Қарағанды облысы) үздік атанды. Екінші және үшінші орындарды тиісінше Мария Шувалова (Павлодар облысы) мен Анна Шумило (Қарағанды облысы) жеңіп алды. Ерлер арасында бұл қашықтықта алтын медальді Эльнор Мухитдинов (ШҚО) иеленсе, күміс жүлде Андрей Соколовқа (ШҚО), қола жүлде Мәди Төкеновке (Астана) бұйырды.

Әйелдер арасында ұзындыққа секіруден Алина Чистякова (Қарағанды облысы) жеңімпаз атанды, ал ядро лақтыру сайысында Ирина Конишева (Алматы) алтын медальға қол жеткізді.

60 метр қашықтықта әйелдер арасында Ольга Сафронова (Павлодар облысы), ерлер арасында Алмат Төлебаев (Алматы) ең үздік нәтиже көрсетті. Ерлер арасында биіктікке секіруден Түркістан облысының өкілі Антон Боднар жеңіске жетті.

Чемпионат үш күнге созылады. Осы уақыт аралығында спортшылар жеке бағдарламалар мен эстафеталарды қоса алғанда, 13 дисциплина бойынша 31 медаль жиынтығын сарапқа салады. Жарысқа Қазақстанның 18 өңірінен келген спортшылар қатысуда.

Еске салсақ, кеше Ольга Рыпакова жеңіл атлетика федерациясының президенті қызметінен кетті. Федерацияның жаңа президенті болып «ҚазМұнайГаз» ұлттық компаниясы» АҚ басқарма төрағасы Асхат Хасенов тағайындалды.

Тақырыпқа қатысты:

Жаңалықтар

барлық жаңалықтар