Астанада Перизат Қайратқа қатысты сот отырысы жартылай жабық өтеді

«Biz Birgemiz Qazaqstan» қорының басшысы Перизат Қайраттың ісі жартылай жабық өтеді, деп хабарлайды Orda.kz.

Сот процесінің ашық немесе жабық өту мәселесі бойынша шешімді судья Сабыржан Кәрімов қабылдады. Оның айтуынша, негізгі сот отырысы 14 шілдеде ашық өтеді. Алайда айыпталушылардың жеке мәліметтері мен банк құпиясына қатысты жауаптары жабық қаралады. Перизат Қайрат пен оның адвокаты қылмыстық істің материалдарында өте көп жеке және қаржылық ақпарат бар екенін алға тартып, жабық өтуін өтінген.

Сондай-ақ, Перизат тергеу изоляторында қысым көріп, барлық құқықтары тапталғаны жайлы айтты

«Ұрып-соғу фактісі бойынша қылмыстық іс Астана прокуратурасында тіркелді. Денедегі жарақаттарды тергеу изоляторының қызметкерлері салған. Қанша рет өтініш берсем де, маған бір рет те қоғамдық қорғаушы тағайындалған жоқ»
дейді Периат көзіне жас алып. 

Тергеу мәліметінше, Перизат Қайратқа су тасқынынан зардап шеккен қазақстандықтар мен қақтығыстан зардап шеккен палестиналықтарға көмек ретінде жиналған 3,5 млрд теңге көлеміндегі қаражатты жымқырды деген айып тағылып отыр.

Бұл іске Перизаттың анасы Ғайни Алашбаева да тартылған. Оған алаяқтық және қылмыстық жолмен алынған кірістерді заңдастыру баптары бойынша айып тағылған.

Тергеу нұсқасы бойынша, Перизат Қайрат миллиардтан астам теңгені қолма-қол ақша қылып шығарып алып, жеке қажеттіліктеріне жұмсаған. Қаражат жөндеу, жиһаз, жол жүру және киім-кешек шығындарына кеткен. Солардың арасында 6,9 млн теңгеге сатып алынған Rolex сағаты да бар.