Астанада қасбет құлап, жарақат алған екі адам жансақтау бөлімінде жатыр, бір фельдшердің жағдайы ауыр

Қасбет пен ауа баптағыш құлағаннан кейін зардап шеккен екі адам жансақтау бөлімінде, үшеуі бейінді бөлімшелерде жатыр, зардап шеккендер арасында қызметтік міндеттерін атқару кезінде жарақат алған екі фельдшер де бар, деп хабарлайды Orda.kz  Астана әкімінің баспасөз қызметіне сілтеп. 

«ТК қасбетінің сыртқы кірпіш қаптамасы мен ауа баптағыш қондырғысының құлауы салдарынан 5 адам зардап шекті. Зардап шеккендердің барлығы 8 қарашада № 1 көпсалалы ауруханаға жеткізілді. 9 қарашадағы жағдай бойынша жансақтау бөлімінде екі науқас, үшеуі - бейінді бөлімдерде жатыр. Бес зардап шегушінің екеуі - қызметтік міндеттерін атқару кезінде өндірістік жарақат алған фельдшерлер екенін хабарлаймыз» деп жазылған хабарламада.

 Әкімдіктің мәліметінше, реанимациядағы фельдшердің жағдайы өте ауыр деп бағалануда. Екінші фельдшер нейрохирургия бөлімшесінде емделуде, оның жағдайы орташа дәрежеде. Барлық зардап шеккендер дәрігерлердің бақылауында және қажетті медициналық көмек алуда.

«Қосымша хабарлағанымыздай, әлеуметтік желілерде таратылатын фельдшерлердің жарақаттары өндірістік жарақат деп танылмайды деген ақпарат шындыққа сәйкес келмейді. Бұл оқиға өндірістік жарақатқа жатады», деп нақтылады әкімдік.

Оқиға фактісі бойынша қалалық полиция департаменті сотқа дейінгі тергеу жүргізіп жатыр. Сондай-ақ, ҚР Еңбек кодексінің 188-бабына сәйкес, мемлекеттік еңбек инспекторы жазатайым оқиғаға тексеру жүргізуде.

Естеріңізге сала кетейік, 8 қараша күні астана қаласының Алматы ауданында Тәуелсіздік даңғылы, 24Б мекен-жайы бойынша 9 қабатты тұрғын үйдің қасбетінен сыртқы кірпіш қаптамасы мен кондиционерлік қондырғы құлаған болатын.

Кеше Атырау облысында «Блогерлік тексеру» деп қорқытып, қомақты қаражат сұраған белсенді ұсталды.