Қасіретті қаңтарға жауапты мекеме басшылары мәжіліске шақыртылды

Мәжіліс қанды қаңтар оқиғасының тергеу барысын талқылауға құқық қорғау органдарының басшыларын шақырады.

Депутат Жанарбек Әшімжанов Бас прокурор Берік Асыловқа жолдаған сауалында Қанды қаңтар оқиғасы бойынша тергеу қай сатыда екенін сұрады.

«Әрине, депутат ретінде қылмыстық істерге араласуға, қандай да бір баға беруге құқығымыз жоқ. Соған қарамастан, біздің міндетіміз – тиісті мемлекеттік құрылымдарға сайлаушылардың тілегі мен талабын жеткізу. Ресми ақпарат болмаған соң болжам мен ойдан шығару басым болып, түрлі қауесеттер тарайды. Ал кейде, әрине, мұны өз пайдасына асыратын ішкі және сыртқы күштер бар. Тергеу әдеттегідей жүріп жатқанын түсінеміз, белгілі бір процедуралар бар, бірақ бұл ретте бастапқы дереккөзден ақпарат алуға мүмкіндік жоқ» деді мәжіліс депутаты.

Депутат қаңтар оқиғасы бойынша тергеу жұмыстары қашан аяқталатынын және тергеу тәртіпсіздіктерді ұйымдастырушылар мен арандатушыларды қашан атауды жоспарлап отырғанын сұрады.

«Қылмыстық іс қашан аяқталады, қашан сотқа түседі. Жалпы, сол күндері не болды? Бұл – қоғам тарапынан қойылған сұрақтар. Бұл сұрақтарға ашық, анық, жан-жақты жауаптар берілуі керек. Сондықтан тиісті құқық қорғау органдары, мемлекеттік органдардың басшылары мәжіліске келіп, жауап беруі керек» деді Әшімжанов.

Бұған дейін тәртіпсіздікті тексеруге екі айдан әлдеқайда көп уақыт кететінін айтқан палата спикері Ерлан Қошанов депутаттың талабын қолдады.

Тергеуге екі айдан көп уақыт кетеді

«Біз тергеу барысына, әсіресе құпия істер бойынша араласа алмаймыз. Әрине, белгілі бір конституциялық шектеулер бар, бірақ сонымен бірге қоғам қаңтар оқиғасына қатысты сұрақтарға жауап күтуде. Әрине, құқық қорғау органдары басшыларының ақпаратын тыңдау дұрыс болар еді. Біздің заңнамада мемлекеттік орган басшыларының жалпы отырыста депутаттық сауалға ауызша жауап беру мүмкіндігі қарастырылған. Сондықтан аппарат басшысы мен тиісті комитетке осыны ұйымдастыруды тапсырамын» деді Қошанов.

Еске салсақ, қаңтар оқиғасынан кейін ҰҚК-нің бұрынғы төрағасы Кәрім Мәсімов пен оның экс-орынбасарлары Әнуар Садықұлов пен Дәулет Ерғожинге қатысты билікті күштеп басып алу, мемлекетке опасыздық жасау және билікті асыра пайдалану фактілері бойынша тергеу басталған болатын. Мәсімовтің үшінші орынбасары Марат Осипов билігін асыра пайдаланды деген күдікке ілінді.

Бас прокурор Асылов қамауда 669 адам қалғанын, олардың 56-сының дене жарақаттары бар екенін айтты. Төрт адам жарақатына байланысты емделіп жатыр. Қалғандары медициналық көмекке мұқтаж емес.