Алматы қаласы мен Алматы облысында электр энергиясының бағасы өседі

 Бұл туралы Алматы қаласы бойынша табиғи монополияларды реттеу комитеті департаменті өзінің ресми Facebook парақшасында хабарлады. Алайда бұған дейін ашық қоғамдық тыңдаулар өтеді. Тыңдаулар «Алатау жарық компаниясы» акционерлік қоғамының «ЭнергоСбыт» филиалының өтініші бойынша ұйымдастырылады, деп хабарлайды Orda.kz.       

Сонымен қазіргі электр энергиясы тарифін 6,6 пайызға көтеру ұсынылып отыр. Есептеу үшін екі нұсқа ұсынылған: тұтыну көлеміне байланысты және тұтынушылар санаты бойынша.

Тариф мөлшерлемелері әзірге түпкілікті емес, олар 15 қыркүйекте өтетін қоғамдық тыңдаулардың нәтижесі бойынша бекітіледі.

Тыңдаулар Алматы қаласы, Қожамқұлов көшесі, 170 А мекенжайында өтеді.

Басталуы – сағат 11:00-де.

Онсыз да өңірлерді қымбатшылық жайлап,  отандық өндіріс импорттық өнімнің көлеңкесінде қалып келеді. 

Ұлттық экономика бірінші вице-министрі Азамат Әмриннің айтуынша, тамыз айында жылдық инфляция 12,2 пайызға дейін жеделдеді (шілде айында – 11,8 пайыз болған). Ең көп баға өсімі мына өңірлерде байқалды:

• Қарағанды облысы – 14,4 %
• Ұлытау облысы – 13,6 %
• Ақмола облысы – 13 %
• Атырау облысы – 12,8 %
• Солтүстік Қазақстан облысы – 12,6 %
• Ақтөбе облысы – 12,5 %
• Батыс Қазақстан облысы – 12,4 %
• Астана қаласы – 12,8 %
• Алматы қаласы – 12,7 %.

Сонымен қатар  сарапшылар да  Қазақстан халқының кірістері мен шығыстары жөніндегі статистиканы зерттеп, елімізде азық-түлікке жұмсалатын шығын үлесі әлем бойынша ең жоғары деңгейде екенін анықтады. Бір сөзбен айтқанда халық бес жылдан бері табысының жартысынан көбін тамаққа жұмсап отыр.