Әлия Молдағұлованың 100 жылдығы дрон шоуымен көмкерілді

Ақтөбеде қазақтың батыр қызына арналған  «Әлия - ғұмыр» атты екі күндік мерекелік шара өтті, деп хабарлайды Orda.kz.       

Шараға облыс әкімі Асхат Шахаров пен Қазақстан Республикасы Президентінің кеңесшісі Мәлік Отарбаев қатысты. Негізгі мереке «Қазақ халқына мың алғыс» стеласы жанындағы алаңда өтті. Концерттік бағдарлама көрермендерге ұнады. Сахнада жергілікті эстрада жұлдыздары мен астанадан келген әртістер өнер көрсетті. Аллаберген Жақсыбаев, Рита мен Дулат Айтжановтар, Қанат пен Светлана Айтбаевтар, Мирас пен Құралай Бекжановтар, Марат Әйтімов, Әлихан Зейнолла және басқа да көптеген әншілер батыр қыздың тойына өз үлестерін ән-шашумен қосты. 

Ең алдымен жұлдыздармен телекөпір көрсетіліп, олар ақтөбеліктерге жылы лебізбен сөйледі. Содан кейін әртістер сахнаға шығып, көрермендердің сүйікті әндерін орындады.

Танымал орындаушы Садраддин мен Роза Рымбаеваның өнері жұртшылықты ерекше қуантты. Садраддин көрермендердің сұрауы бойынша өзінің «Үйге», «Қанша күн?», «Бақыт», «Жауап бар ма?» және басқа да хитт әндерін орындады. 

Ал халық әртісі Роза Рымбаева көрермендерге сүйікті «Сол бір кездер», «Шақырады көктем», «Балдәурен» әндерін сыйға тартты. Кеш соңында батыр қызымыз  Әлияға арналып жазылған «Әлия» әні орындалып, жиналған жұрт қосылып әнді қалықтатып әкетті.

Осы арада ұшып шыққан жүздеген дрондар түнгі аспанды жарқыраған экранға айналдырды. Көрермендер Әлия Молдағұлованың, Димаш Құдайбергеннің бейнелерін, Ақтөбе рәміздерін және басқа да визуалды композицияларды тамашалады. 

Аспаннан мемлекеттік туды көрсеткен кезінде 40 мыңнан астам көрермен бір уақытта  әнұранды орындады. Жарықтық шоу керемет музыка мен лазерлердің көмегімен көмкерілді.

Жыл басынан бері өтіп жатқан Әлия Молдағұлованың 100 жылдығына арналған шаралар тарихымыз бен мәдениетіміздің бірлігі мен мақтанышының көрінісіне айналды. 

Мерекелік шара екі күн бойы қызу жалғасқан бағдарламамен аяқталды. Шара барысында спорттық жарыстар, мерекелік концерттер, театрландырылған қойылымдар мен батырдың ескерткішіне гүл шоқтарын қою рәсімдері өтті. Мереке облыс тұрғындарының басын қосып, жастарды шабыттандырды, қазақ аруының үлгісі болашақ ұрпаққа мәңгілік бағдар береді.

Әлия Молдағұлованың есімі мен құрметі тек ақтөбеліктердің ғана емес бүкіл қазақ халқының жүрегіне мәңгі орнаған, ал мерейтойлық оқиғалар оның өшпес ерлігі мен жастарға қалдырған рухани мұрасын еске салып, жарқырата береді.