Ақтөбе облысында 12 адамның өмірін қиған жол апаты: екі адам ауруханадан шықты

Ақтөбе облысында 12 адам қаза болған ірі жол апатынан аман қалған алты адамның екеуі ауруханадан шығарылды, деп хабарлайды Orda.kz.

Облыстық денсаулық сақтау басқармасының мәліметінше, № 1 Ақтөбе қалалық ауруханасында жатқан үш адамның екеуі емін аяқтап, үйлеріне жіберілген.

Тағы бір науқастың жағдайы тұрақты. Оған ота жасалып, ем жалғасып жатыр. Ал облыстық балалар ауруханасында жатқан жасөспірімнің халі өте ауыр, ол әлі есін жимаған.

23 қазанда таңертең республикалық маңызы бар «Самара – Шымкент» автожолының 927-шақырымында, Белқопа ауылының маңында болған жол апаты салдарынан 12 адам қаза тапты.