Ақша бопсалап, өзіне қол салуға итермеледі: Щучинскіде ұйымдасқан қылмыстық топ мүшелеріне сот үкімі шықты

Бүкіл Ақмола облысын үрейде ұстаған қылмыстық топтың 11 мүшесіне қатысты сот үкімі шықты. Оларға қатысты студент қайтыс болғаннан кейін ғана әрекет жасалды. Жігіттің анасы Ішкі істер министрлігінен істі бақылауға алуды сұрады. Президент Қасым-Жомарт Тоқаев бұл оқиғаға  жауап берді, деп хабарлайды Orda.kz порталы.

Жастар бопсалады, бұзақылық жасады және жасөспірімді өз-өзіне қол жұмсауға итермеледі деп айыпталған.  Олар Бурабай өңірін екі жыл бойы шулатты. Бұзақылар 12 адамды жарақаттап, қорқытып, әрқайсысынан 130-дан 500 мың теңгеге дейін бопсалаған.

«Жеті адам төрт жылдан бес жылға дейін бас бостандығынан айырылды. Кәмелетке толмаған сотталушы жәбірленушілермен татуласқандықтан жауапкершіліктен босатылды. Қалғандарына бес жыл мерзімге бас бостандығын шектеу жазасы тағайындалды» деп хабарлады Ақмола сотының баспасөз қызметі. 

Сотталғандар жәбірленушілерге моральдық шығын үшін үш миллион теңге төлеуге және материалдық шығынды өтеуге уәде берді.

Сонымен қатар сот ішкі істер бөлімі мен аудан әкіміне жастарды жұмысқа орналастыруды жақсартуды және сот процесінде жіберілген заң бұзушылықтарды түзетуді талап етіп, жеке ұйғарым жіберді.

Естеріңізге сала кетейік, қайтыс болған Щучинск жоғары техникалық колледжінің төртінші курс студенті Роман Бодагов 2023 жылдың 6 қазанына қараған түні темір жолдан табылған болатын. Полиция істің мән-жайын анықтауға ұзақ уақыт жұмсады. Бірақ жергілікті тұрғындар бірден өз үкімін шығарды. Соңғы кезде қалада бопсалаудың артуына байланысты жастардың өз-өзіне қол жұмсауы көбейген.