АҚШ-та Трамптың жақтаушысы Чарли Киркті сөз сөйлеп тұрғанда атып өлтірді

АҚШ-тың Юта штатында Дональд Трамптың жақтаушысы әрі саяси белсенді Чарли Киркке шабуыл жасалды. Оқиға Юта Вэлли университетінің ғимаратында сөз сөйлеп тұрғанда болды, деп хабарлайды Orda.kz.

Киркті шамамен 200 метр қашықтықтан атқан. Оқ мойнына тиген. Жараланған адам ауыр жағдайда ауруханаға жеткізілді. Алайда кейін АҚШ президенті Дональд Трамп Чарли Кирктің қайтыс болғанын хабарлады.

Чарли Кирк 31 жаста еді. Ол Turning Point USA студенттік қозғалысының негізін қалаушы, бұл ұйым жастар арасында ескі құндылықтарды насихаттайтын. Сонымен қатар, Кирк подкаст жүргізіп, саяси пікірталастарға белсенді қатысатын.

Оқиға университетте дүрбелең туғызды. Студенттер қорқып, оқиға орнынан үдере қашты. Әлеуметтік желілерде айқай-шуға толы, кампусты тастап қашып бара жатқан адамдардың бейнежазбалары таралды.

Бастапқыда билік күдіктіні ұстағанын мәлімдеген. Алайда кейін оның әлі де бостандықта екенін растады.