Ақмола облысында өртеніп жатқан пәтерден адам құтқарылды

Ақмола облысындағы елді мекендердің бірінде орналасқан бес қабатты тұрғын үйде өрт шығып, өртеніп жатқан пәтерден бір адам құтқарылды, деп хабарлайды Orda.kz өңірлік ТЖД-ға сілтеме жасап.

Бүгін Шортанды ауданына қарасты Ғылыми (Научный) кентінде бес қабатты тұрғын үйдің бір пәтерінде өрт болды. Өрттің жалпы аумағы 8 шаршы метр.

Төтенше жағдайлар департаментінің мәліметінше, ғимараттан өздігінен 17 адам эвакуацияланған, олардың үшеуі – балалар. Сондай-ақ пәтер ішінен бір газ баллоны сыртқа шығарылды.

«Құтқарушылардың үйлесімді әрі жедел әрекеттерінің арқасында өрттің одан әрі таралуының алдын алынды. Өртеніп жатқан пәтерден «Д» есебінде тұрған бір адам құтқарылып, жедел медициналық жәрдем бригадасына тапсырылды»,  деп хабарлады ТЖД.

Өрт толығымен сөндірілді. Қаза тапқандар мен зардап шеккендер жоқ.

Құтқарушылардың хабарлауынша, өрттің алдын ала себебі – электр сымдарын монтаждау кезінде өрт қауіпсіздігі ережелерінің бұзылғаны.

Еске салсақ, Иранда наразы халық Солтүстік Хорасан прокурорын тірідей өртеп жіберді.