Ақмола облысында өрт сөндірушілер мен дәрігерлер бірлесіп жұмыс істей бастады

Макинск қаласында өрт сөндірушілер мен дәрігерлердің біріккен бөлімі іске қосылды, ол қала мен оған жақын орналасқан елді мекендердегі 30 мыңнан астам адамның қауіпсіздігіне жауапты болады, деп хабарлайды Төтенше жағдайлар министрлігінің баспасөз қызметіне сілтеме жасап Orda.kz.

«Қазақстандағы авариялық-құтқару қызметі жүйесін жаңғырту аясында Ақмола облысының Макинск қаласында өрт сөндірушілер мен медицина қызметкерлерінің функцияларын біріктіретін жаңа мамандандырылған бөлім ашылды. Жаңа бөлім 30 мыңнан астам адам тұратын жақын маңдағы бірнеше елді мекеннің қауіпсіздігін қамтамасыз етеді» деп жазылған хабарламада.

Бұл Қазақстандағы құтқару жүйесін жаңғырту бойынша пилоттық жобаның алғашқы қадамдарының бірі.

1964 жылы салынған № 8 өрт сөндіру бекеті күрделі жөндеуден өтті. Ғимарат заманауи құрал-жабдықтармен жабдықталып, құтқарушылардың жұмыс жағдайлары жақсартылып, медициналық кабинет қосылды. Кеңсеге Астана-Көкшетау тас жолынан автожол медициналық құтқару орталығы көшірілді.

Ас үй, жуынатын орын, демалыс бөлмелері, жабдықтар қоймасы және спорт залы кіретін сервистік және тұрғын үй-жайлары жаңартылды.

Өрттерді және жол-көлік оқиғаларының салдарын жоюмен қатар бөлім қызметкерлері шұғыл медициналық көмек көрсетеді.

Жұмыс сапары барысында Төтенше жағдайлар министрі Шыңғыс Әрінов мұндай шаралар қызмет көрсету сапасын арттыруға бағытталғанын атап өтті. Бөлім төтенше жағдайларды жоюдың жаңа тәсілдерін сынауды жалғастырады.

«Шара соңында министр ведомстволық наградаларды табыс етті. Ақмола облысы Төтенше жағдайлар департаменті бастығының міндетін атқарушы Бақытжан Алашов «Азаматтық қорғау жүйесін дамытуға қосқан үлесі үшін» төсбелгісімен марапатталды. «Қазақстан құтқару қоры» басшысы Рашид Жанұзақов Құрмет грамотасын, ал жоғары кәсіпқойлығы үшін құтқару қызметінің жүргізушілері Ерлан Арынғазин мен Сергей Попов алғыс хатқа ие болды», деп атап өтті департамент.