Әкімдік Қаныш Сәтпаев атындағы мектепті «бұзу» жайындағы алматылықтардың наразылығына жауап берді

Бұдан бұрын желіде Алматыдағы № 56 мектеп ғимаратын бұзып жатқаны туралы ақпарат тараған болатын. Дегенмен бұл жағдайға қала әкімдігінің өз уәжі бар екен, олар таралған ақпараттың шындыққа сәйкес келмейтінін мәлімдеді, деп хабарлайды Orda.kz.

 Мектеп ғимаратының бұзылып жатқаны туралы ақпарат бұрын желіде желдей есіп, жұртшылықты алаңдатқаны рас. 

 «Шынымен 56 мектеп толығымен бұзылып жатыр ма? Оны қоғамдық тыңдаусыз кім және қашан шешіп тастаған?»  деген ашулы постар жазылды. 

Бүгін Алматы әкімдігі әлеуметтік желілер мен БАҚ-та Қ.Сәтбаев атындағы № 56 мектеп-гимназиясы ғимаратын бұзу туралы таратылған ақпарат шындыққа жанаспайтынын ресми түрде мәлімдеді.

«Мектепті сейсмикалық күшейту және күрделі жөндеу жұмыстары жүргізілуде. Қолданыстағы құрылыстарды бұзу қарастырылмаған. Бұл ретте ғимараттың тарихи қасбеті сақталады»,  деп хабарлады қаланың құрылыс басқармасы. 

Әкімдіктің арпаратына сенсек, жобада өзектi бiлiм беру стандарттарына сәйкес келетiн қазiргi заманғы оқу кеңiстiктерiн құру көзделіпті.

 Техникалық бағыттағы пәндерді қоса алғанда, негізгі және бейінді пәндер бойынша сабақ өткізуге арналған сыныптар, зертханалар мен кабинеттер жаңартылады екен. Химия, физика, биология кабинеттері заманауи тәжірибелік жабдықтармен жабдықталады, бұл оқушыларға практикалық дағдылар алуға және зерттеу жүргізуге мүмкіндік береді.

 Жоба көпфункционалды спорт кешенінің құрылысын да қамтиды. Мектеп аумағында ашық спорт алаңдары пайда болады.

 Бұдан басқа, кең демалыс аймақтары, заманауи асхана, кітапхана, оқу залдары және мультимедиялық жабдықтармен жабдықталған үйірмелерге арналған орындар қарастырылған.

 Құрылыс-монтаж жұмыстарын аяқтау 2026 жылдың сәуіріне жоспарланған.

Дегенмен әкімдік қоғаммен байланыс жұмыстарына көңіл бөліп, осындай шаруаларды уақтылы халыққа хабарлап, алдын-ала түсіндіру жұмыстарын жүргізіп отырса мұндай шу болмас еді. Осымен бірнеше рет қала әкімдігі ақпаратқа жұртшылық наразылығынан кейін ғана жауап берді. Жаңадан келген әкім осы жұмысты жандандырып, БАҚ-пен жұмысын жандандырады деп сенейік.

Алматыда Конституция күні мен Білім күніне орай, «Келешек мектептері» жобасы аясында 22 500 оқушыға арналған 12 жаңа мектеп есігін ашты.

Алматы қаласының Бостандық ауданында орналасқан №215 жаңа жалпы білім беретін мектептің оқу жылын тек қазақ тілінде бастады.  Бұл мәселе де жаз бойы әлеуметтік желілерде дау туғызған болатын.