Айтыскер ақын Балғынбек Имашевтың ұлы алаяқтық бойынша күдікке ілінді

Айтыскер ақын Балғынбек Имашевтың ұлы Данияр Имашев алаяқтық фактісі бойынша тергеуге алынды, деп хабарлайды Orda.kz.

Данияр Имашев бұған дейін «Qazaq Travel» компаниясының атқарушы директоры қызметін атқарған. Компания арқылы қажылыққа бармақ болған азаматтар сапардың соңғы күні ұшпайтынын естіген. Жәбірленушілер Әуезов аудандық полиция басқармасына шағым түсірген. Айтуларынша, компания бір күн қалғанда сапардың болмайтынын хабарлаған, алайда алдын ала ешқандай ескерту жасалмаған. Сонымен қатар, олар компания тарапынан нақты түсініктеме де, дәлел де ұсынылмағанын алға тартады.

Қазіргі таңда «Qazaq Travel» кеңсесі жабық. Мәдина мен Меккеге аттана алмаған 50-ге жуық адамның шағымынан кейін полиция алаяқтық бабы бойынша қылмыстық іс қозғады. Бұл іс аясында үш адам күдікті деп танылған, олардың қатарында компанияның бұрынғы атқарушы директоры Данияр Имашев та бар.