19 жастағы «Хан-Тәңірі» клубының шабуылшысы Диас Төлеу алаңда көз жұмды

«Хан-Тәңірі» клубының 19 жастағы шабуылшысы Диас Төлеу футбол алаңында көз жұмды, деп хабарлайды Orda.kz. 

Ол бүгін «Екібастұзға» қарсы өткен ойында негізгі құрамда ойнаған. Алайда екінші таймда өзін жайсыз сезінген соң ауыстырылды. 64-минутта Диасты алаңнан зембілмен шығарып кетті.

Қаралы хабарды «Хан-Тәңірі» ФК ресми Instagram парақшасында жариялады.

«Хан Тәңірі футбол клубы ауыр қайғыда. Бүгін біздің ойыншымыз Диас Тулеу кенеттен өмірден өтті. Клуб атынан Диастың отбасына, туған-туыстарына және жақындарына шын жүректен көңіл айтамыз.Диастың есімі мен бейнесі біздің жүрегімізде мәңгі сақталады» — деп жазды «Хан-Тәңірі».

ҚФФ бас хатшысы Давид Лория мен кәсіби клубтар арасындағы жарыстарды ұйымдастыру дирекциясының басшысы Бақытжан Пазылқайыр оқиғаның толық мән-жайын анықтау үшін шұғыл Алматыға аттанды.

Диас Төлеу — «Қайрат» клубының түлегі, биылғы маусымда «Хан-Тәңірі» сапында 25 матч өткізіп, 3 гол соғып, 4 нәтижелі пас берген.

⠀