«1,2 млрд теңге жымқырды»: Алмасбек Садырбайға аппеляциялық сот қандай шешім шығарды?

1,2 млрд теңге көлеміндегі субсидия қаржысын жымқырды деген күдікпен ұсталған Алмасбек Садырбайдың Қонаев қаласында апелляциялық соты өтті, деп хабарлайды Orda.kz.

Бұл апелляциялық сотта Алмасбек Садырбайды үй қамаққа шығару ұсынылды.

«Бүгін біз соттың прокуратураның пайдасына шешім шығарғанына куә болдық. Алмасбекті қамауда ұстауға ешқандай негіз жоқ еді. Бұл Жоғарғы соттың қаулысында, нормативтік қаулыларда және қылмыстық-процессуалдық заңнамада көрсетілген. Сот прокуратура мен тергеу органдары ұстанымын қолдады, алдағы уақытта біз бұл мәселеге қатысты Алмасбек Садырбаймен бірге әрекет етеміз», — деді адвокат Қуаныш Төлегенов.

Қазіргі таңда тағы бір күдікті, Марал Тоқбаева Алматы қаласында үй қамақта отыр.

Сот Алмасбек Садырбайды үй қамаққа шығарудан бас тартып, прокурордың пайдасына шешім шығарды. Қазақстанның түкпір-түкпірінен келген ауыл шаруашылығы басшылары Алмасбек Садырбайға қолдау көрсетуге жиналды, бірақ сот алқа билері олардың пікір білдіруіне рұқсат бермеді.

«Мен Орал қаласынан Батыс Қазақстанның аманатын арқалап, Алмасбекті қолдап келіп отырмын. Сот әділ шешім шығарған жоқ. Алмасбекті бүкіл Қазақстан біледі, оның қашып кетуі мүмкін емес. Орал қаласындағы көптеген мәселелерді шешуде Алмасбектің еңбегі зор болды. Ол адал азамат, тергеу барысында қашып кетпейді, сондықтан оны үй қамаққа шығару керек», — деді Қанат Байкенов.

Естеріңізге сала кетейік, Алматы облысы бойынша Қаржылық мониторинг агенттігінің департаменті аймақтық прокуратурамен бірлесіп, «Шаңырақ» қоғамдық бірлестігінің жетекшісі Алмасбек Садырбайды 1,2 миллиард теңгеден астам қаражат жымқырды деген күдікпен ұстаған болатын.