Жұрт жаппай теңгесін өткізіп жатыр

Қолма-қол валюта сатылымы соңғы айлар үшін сарапшылар «тарихи» деп атаған деңгейге дейін өсіп кетті, деп хабарлайды Orda.kz.

Ұлттық банктің деректеріне сәйкес, қазанда айырбастау пункттері қазақстандықтарға қолма-қол долларды сатып алғаннан гөрі көбірек сатқан. Біздің валютаға шаққанда айырмашылық 232,8 млрд теңге болды.

Номиналды көрсеткіш бір айда 2,2 есе, бір жылда 36,9%-ға өсті. Масштаб тұрғысынан бұл — 2023 жылдың соңынан бергі ең жоғарғы деңгей, деп есептейді Бірінші кредиттік бюро.

«Соңғы ай қорытындысы бойынша, 1 қазаннан 1 қарашаға дейін америкалық валюта ұлттық валютаға шаққанда 3,4%-ға арзандап, 530,47 теңгеге дейін төмендеді. Айта кету керек, теңгенің нығаюы қазанның басында басталды, орта шенінде немесе соңында емес. Бұл үрдіс ай бойы сақталды», — деп түсіндірді бюро өкілдері. 

Әдеттегідей, негізгі үлесті мегаполис қалалар енгізді — Алматы, Астана және Шымкент жалпы операциялардың 67%-ын құрады. Әсіресе Алматы ерекшеленді: мұнда доллардың нетто-сатылымы бір айда 4,1 есе, бір жылда 2,4 есе өсіп, 92,4 млрд теңгеге жетті.

Маңыздысы — Ұлттық банктің статистикасы теңгемен көрсетілген, яғни валюта бағамының өзгерісін ескермейді. Алайда қазан айының орташа бағамымен қайта есептегеннің өзінде, соңғы 11 ай ішіндегі ең жоғары көрсеткіш тіркелді.

Басқа валюталардың жағдайы қалай?

Евро: нетто-сатылым бір айда 73,1%-ға өсті, бірақ бір жылда 22,7%-ға қысқарып, 13,9 млрд теңге болды.

Рубльге сұраныс әлі жоқ — керісінше, қазақстандықтар рубльді кері өткізуді жалғастырып жатыр.

Қазанда рубль бойынша нетто-сатылым одан әрі төмендеп, –32,1 млрд теңге болды (қыркүйекте –16,7 млрд). Бір жыл бұрын, 2024 жылғы қазанда жағдай керісінше еді — көрсеткіш оң аймаққа шығып, 8,8 млрд теңге болған.

 
Айтпақшы, келесі жылы  доллар бағамы 600-610 теңгеге жетуі мүмкін – бұл туралы Halyk Finance сарапшылары өзінің соңғы талдамалық шолуында ескертті.

Шілде айында теңге ресми есеп бойынша долларға қатысты 4 пайызға арзандады. Ұлттық банк «отқа су сепкендей» 125 миллион доллар көлемінде валюта интервенциясын жасады. Бірақ бұл науқасқа көмектесе ме? Мына материалдан қараңыз.