«Жұмыс істегенсіп, жайларыңа кеттіңдер ме?» Тоқаев әкімдерге ескерту жасады

Мемлекет басшысы Қасым-Жомарт Тоқаев облыстар мен қалаларда Қазақстанды абаттандыру және аумақтарды тазарту бойынша тұрақты жұмыс жүргізуді тапсырды, - деп хабарлайды Orda.kz Ақорданың баспасөз қызметіне сілтеме жасап.

Мемлекет басшысы су тасқынына қарсы іс-шараларды үйлестіру және су тасқыны зардаптарын жою жөніндегі республикалық штаб отырысында әкімдерге ескерту жасады.

«Су тасқынынан зардап шекпеген өңірлерде менің тапсырмам бойынша «Таза Қазақстан» акциясы басталып жатыр. Мен барлық әкімдерге бұл бір реттік науқан емес екенін ескерттім. Яғни, сенбілікке шығып,  жұмыс істегенсіп, жайларыңа кеттіңдер ме? Жоқ, олай болмайды. Бірқатар көршілес мемлекеттердің тәжірибесіне сүйене отырып, Қазақстанды көгалдандыру, облыстар мен қалалардағы аумақтарды тазарту бойынша жұмыс үнемі жүргізілуі керек», – деді Қасым-Жомарт Тоқаев

Мемлекет басшысы азаматтарға тұрғын үйді қалпына келтіру жұмыстарын нақты уақыт режимінде бақылауды қамтамасыз етуді тапсырды. Сондай-ақ, ол биылғы жылдың соңына дейін су тасқынын басқарудың ұзақ мерзімді стратегиясын анықтап, тиісті бағдарламалық құжаттарды қабылдау қажет деп санайды.