Жуалы ауданында фельдшерді қорлаған тұрғынға айыппұл салынды

Жуалы ауданында фельдшерді қорлаған тұрғынға айыппұл салынды, деп хабарлайды Orda.kz.

Жуалы аудандық соты медицина қызметкерін қорлаған тұрғынға қатысты әкімшілік істі қарады.

«Мейрамханадан оралған соң өзін жайсыз сезінген мас азамат Т. жедел жәрдем шақырған. Алайда фельдшер келгенде ол балағат сөз айтып, дәрі-дәрмек салынған сөмкесін теуіп жіберген. Қорыққан фельдшер полицияға хабарлауға мәжбүр болды. Өз түсіндірмесінде Т. мейрамханада өткен іс-шарадан үйге келгенде аяғын сезбегенін, содан кейін жедел жәрдем шақырғанын түсіндірді», деп мәлімдеді Жуалы аудандық сотының баспасөз қызметі

Сотта азамат кінәсін толық мойындап, кешірім сұрады. Оның өкінгенін әрі кәмелетке толмаған балалары бар екенін ескерген сот айыппұлды 30 пайызға қысқартты.

Еске сала кетсек, Түркістанда ер адам әйелінің ішін ұстап тексеріп көрген фельдшерді соққыға жыққан еді.

Нәтижесінде Т.-ға 82 мың теңге айыппұл салынды. Қаулы әзірге заңды күшіне енген жоқ.