Жиенбай Берденовтің қабылдауына дайындықсыз, ұқыпсыз киіммен келген — куәгерлер

Шымкентте Руслан Берденов пен Ернар Жиенбайдың соты әлі де жалғасып жатыр. Куәгерлердің айтуынша, Ернар Жиенбай Берденовтің қабылдауына дайындықсыз әрі үй киімімен келген, деп хабарлайды Orda.kz.

Сотта әкімдік қызметкерлері жауап берді. Сотта әкім орынбасарының көмекшісі Талап Рахымбердиев Ернар Жиенбайдың жұмысында кем-кетіктер болғанын айтты.

«Қабылдауға дайындықсыз, презентациясыз келді. «Есебіңді әкел» деп ескерткенбіз. Киімі ұқыпсыз, костюмсіз, галстук тақпай келген. Басшы ресми киінуі керек емес пе?!», – деді Талап Рахымбердиев. 

Куәгердің айтуынша, Жиенбай «Тұрғын үй Шымкент» компаниясының қаражатты игеру туралы ақпараты бар слайд дайындау туралы тапсырманы да орындамаған.

«Бір күн бұрын біз оған осы материалдарды жаса деп айтқанбыз, бірақ ештеңе ұсынылмады».

Кейін Шымкент құрылыс басқармасының қызметкері сөз сөйледі:

«Руслан Берденов әкіммен және құрылыс басқармасының басшысымен кездесулерде бізді Антикор мен ДЭР тарапынан тексеру күтіп тұрғанын үнемі айтатын. Жиенбай бұл кездесулерде болған жоқ, бізді бөлек жинады», — деді құрылыс басқармасының қызметкері.

Еске сала кетейік, Шымкентте Руслан Берденовке оқ атқан Ернар Жиенбай басқарған компания тексеріледі.