Жамбыл облысының жері қытайлықтарға беріле ме?

Әлеуметтік желілерде Қазақстан Қытайға ауыл шаруашылығының ірі жер телімдерін бермек деген ақпарат тарап жатыр. Автордың айтуынша, келіссөздер 2009 жылдан бері жүргізіліп, жер көлемі 1,7 млн гектарға жеткен. Осы ақпаратқа қатысты министрлік нақты жауабын берді, деп хабарлайды Orda.kz.

Бұл мәселеге қатысты Қазақстан Республикасы сыртқы істер министрлігінің баспасөз қызметі түсініктеме берді:

«Қазақстан Қытайға ауыл шаруашылығы мақсатында жер береді деген ақпарат шындыққа сәйкес келмейді. Бұл – фейк. Әлеуметтік желі қолданушыларына ескертеміз: БАҚ немесе ақпараттық-коммуникациялық желілер арқылы көрінеу жалған ақпарат тарату заңмен қудаланады. Тек ресми дереккөздерге сеніңіздер», — деді ҚР СІМ.

Қазақстан Республикасы Ауыл шаруашылығы министрлігінің баспасөз қызметі де түсініктеме берді:

«Қазақстан Республикасы Жер кодексінің 23-бабына сәйкес, ауыл шаруашылығы өндірісін жүргізуге және орман өсіруге арналған жерлерді қоспағанда, шетел азаматтары, азаматтығы жоқ адамдар және шетелдік (мемлекеттік емес) заңды тұлғалар меншік құқығы бар жер учаскелеріне ие бола алады», — деп жауап берді.

Министрліктің мәліметіне қарасақ, бұл құқық жер учаскелері өндірістік және өндірістік емес нысандарды, соның ішінде тұрғын үйлер мен кешендерді салуға берілген жағдайда ғана қолданылады. Сондай-ақ мұндай нысандар оларды күтіп-баптауға арналған жерлерге де қатысты.

Алайда Мемлекет шекарасының шекаралық белдеуінде орналасқан жер учаскелері жеке меншікке немесе уақытша жер пайдалану құқығына берілмейді.

Ал Жер кодексінің 24-бабына сәйкес, шетел азаматтары, азаматтығы жоқ адамдар, шетелдік заңды тұлғалар, шетелдік қатысуы бар қазақстандық заңды тұлғалар, халықаралық ұйымдар, халықаралық қатысуы бар ғылыми орталықтар, сондай-ақ қандастар ауыл шаруашылығы үшін жер учаскелеріне жеке меншікке немесе жер пайдалану құқығымен ие бола алмайды.