Зеленский Стамбұлдағы келіссөздің сәтсіз өтетініне сенімді

Украина президенті Владимир Зеленский Ресей делегациясының Стамбұлдағы  келіссөздерге қатысу деңгейін «жасандылыққа ұқсайды» деп бағалады, деп хабарлайды Orda.kz.

Зеленскийдің айтуынша, Ресей тарапы келіссөзге шынайы ықылас танытып отырған жоқ.

«Біз Түркия президенті Режеп Тайып Ердоғанмен және кеңейтілген түрік делегациясымен кездесуімізді бастаймыз. АҚШ өкілдерімен де байланыс орнаттық, олар да Түркияда жоғары деңгейде қатысады деп ойлаймын. Ал Ресей делегациясының деңгейіне келсек, әзірге ресми ақпарат жоқ, бірақ біз көріп отырған жағдай – бұл бар болғаны жасанды көрініске көбірек ұқсайды», – деді Владимир Зеленский.

Сондай-ақ ол Ердоғанмен бірнеше сағатқа созылатын кездесуден кейін алдағы қадамдар нақтыланатынын атап өтті.

Ал Ресей сыртқы істер министрлігінің ресми өкілі Мария Захарова түрік тарапының өтініші бойынша Мәскеу мен Киев арасындағы келіссөздердің түстен кейінге шегерілгенін хабарлады.