Қызылорда білім беру саласында 340 миллион теңге ұрланды

Қызылорданың сыбайлас жемқорлыққа қарсы қызметі білім беру саласында бюджет қаражатының ұрланғанын анықтады. Шиелі аудандық білім бөлімінің басшысы мен екі қызметкері 340 миллион теңге жымқырды деген күдікке ілінді. Мемлекеттік қаражатты заңсыз беру фактісі бойынша қылмыстық іс қозғалды, аудандық білім бөлімінің басшысы, сектор меңгерушісі және есепшісі қамауға алынды.

Бұл туралы Orda.kz хабарлайды.

—  Тексеру қорытындысы бойынша өткен жылы 300 миллион теңгеден астам қаржы жетіспеушілігі анықталды. Күдіктілердің айтуынша, қаражат жаз айларында мектеп жанындағы лагерлерде ыстық тамақ ұйымдастыруға арналған. Пандемия кезінде білім беру мекемелері карантин енгізілуіне байланысты жұмыс істемеді, оқушылар үйде болды, мектепке бармады, жазғы демалыс лагерлері де жабылды. Осыған байланысты шенеуніктердің қаражатты балаларды тамақпен қамтамасыз етуге жұмсағаны туралы берген түсіндірулеріне негіз жоқ, – деп санайды Қызылорда облысы бойынша сыбайлас жемқорлыққа қарсы іс-қимыл департаменті басшысының орынбасары Руслан Ягмусов.

Шиелі аудандық білім бөлімінің хабарлауынша, ақшалай қаражат беру туралы өтінішпен мектеп тамағын ұйымдастыруға жауапты бөлімнің меңгерушісі құзырлы органдарға жүгінген. Ол тиісті органдардан не болып жатқанын түсінуді сұрады. Алайда тергеу барысында өтініш берушінің қаражатты ұрлау фактісіне қатысы бар-жоғы тексеріледі.

Қылмыстық істің барлық мән-жайларын тергеу-тексеру жұмыстары жүргізіліп жатқандықтан, қаржылық бұзушылыққа күдікті адамдардың аты-жөндері жария етілмейді.

Жанна Сраждинқызы, Қызылорда