«Ұшқыштар соңына дейін күресіп, шеберліктерін көрсетті» – сарапшы

Сарапшылар Ақтау маңында апатқа ұшыраған ұшақтың экипаж мүшелерінің ерлік жасағанын айтты, деп хабарлайды Orda.kz. 

Еске салайық, Ақтаудағы ұшақ апатынан капитан Игорь Кшнякин мен екінші ұшқыш Александр Кальянов және аға бортсерік Хокума Алиева қаза тапты. Қалған екі бортсерік Зульфугар Асадов пен Айдана Рахимли аман қалып, ауруханада жатыр.

AZAL ұшағының құлау кезіндегі соңғы минуттарының егжей-тегжейлі видеосы тарағаннан кейін, сарапшылар ұшақ экипажын «батырға» теңеді. Олардың пікірінше, жолаушыларды құтқару үшін қолдан келгеннің бәрін жасаған ұшқыштар мен бортсеріктер соңғы демі қалғанша күрескен. 

Бейсенбіде Әзірбайжан үкіметінің дереккөздері Euronews-ке апаттың себебі ресейлік әуе зымыраны екенін растады. Кейінірек Reuters агенттігі де дәл осы ақпаратты таратты. 

Әзірбайжандық ұшқыштардың шұғыл қону туралы өтініштеріне қарамастан, Ресей әуежайларына қонуға рұқсат етілмеген. Ұшқыштар Каспий теңізі арқылы Қазақстанға қарай ұшуға мәжбүр болды. Алдын ала мәліметтерге сәйкес, ұшақтың GPS навигациялық жүйелері теңіз үстінен ұшу кезінде бұғатталған.

25 жастағы Айдана Рахимли Маңғыстау облыстық ауруханасында жатыр. Оның әріптесі Зульфугар Асадов басынан, арқасынан, аяғынан және қолынан жарақат алған.