Украинаға қатысты бейбіт жоспар түпкілікті емес — Трамп

АҚШ президентінің айтуынша, оның ұсынып отырған бейбіт жоспары Украинадағы соғысты аяқтауға арналған соңғы нұсқа емес, деп хабарлайды Orda.kz.

Бұл туралы ол Ақ үй маңында журналистерге мәлімдеді.

«Мен бейбітшілікке қол жеткізгім келеді. Біз мұны тоқтатуға тырысып жатырмыз. Қалай болғанда да бұны шешіп, нүктесін қоюымыз керек», —деді Трамп. 

Осы уақытта Еуропа көшбасшылары Оңтүстік Африкада өткен G20 саммитінде құжатты қарап, америкалық бастамаға елеулі түзетулер енгізу қажет екенін мәлімдеді.

«Біз шекара күш қолдану арқылы өзгермеуі тиіс деген қағидатты берік ұстанамыз. Сондай-ақ Украина қарулы күштеріне қатысты ұсынылып отырған шектеулер бізді алаңдатады, өйткені ол елді болашақтағы шабуылдарға осал етуі мүмкін» деп жазылған Еуропа елдері, Канада және Жапония басшыларының бірлескен мәлімдемесінде. 

Сонымен қатар жаңа бейбіт жоспар жөніндегі келіссөздер 23 қарашада Женевада кеңейтілген құрамда өтетіні белгілі болды: Украина, АҚШ, Британия, Франция және Германия. Бұл туралы AFP агенттігі жазады.

АҚШ делегациясы құрлық әскері министрі Дэн Дрисколлдың бастауымен Женеваға барды. Жексенбі күні оларға мемлекеттік хатшы Марко Рубио мен арнайы өкіл Стив Уиткофф қосылады, деп хабарлады CNN.

Еске алсақ, сөзіне ісі сай келмейтін, айтқан сөзінен бір ұйықтап тұрып айни салатын Трамп Нью-Йорк мэріне өзін «фашист» деп атауға жұрт көзінше рұқсат берді.