Түрмедегі азап: Марат Жыланбаевтың сегізінші аштығының себебі не?

Марат Жыланбаевтың адвокаты Мейіржан Досқараев марафоншының сегізінші рет аштық жариялауына не себеп болғанын айтып берді, деп хабарлайды Orda.kz.

2025 жылдың 28 мамырынан бастап Жыланбаевтың тағы да аштық жариялағаны белгілі болды. Бұл жолғы аштықтың басты себебі – жыл басынан бері оған жіберілген хат-хабардың жетпеуі.

«2025 жылдың басынан бері ол Қазақстанда шығатын газеттердің нөмірлері бар үш-ақ хат алған. Оған барлығы 19 хат жолданған еді. Спортпен бірге айналысқан немесе туыстық байланысы бар адамдардан келген басқа да хаттар мүлде берілмеген. Оның өзі жазған хаттары да мекеме қабырғасынан шықпай отыр. Ал бұл – оның Конституциямен бекітілген құқығын бұзу. Осы жағдай оның сегізінші рет аштық жариялауына түрткі болды», – деді адвокат.

Қазақстан билігі Марат Жыланбаевты «саяси тұтқын» деп есептемейді. Марат Жыланбаев колонияда жиі аштық жариялайды. Оған жүгіруге, сурет салуға тыйым салынған. Адвокаты белсендінің құқығы тапталып жатқанын бірнеше рет айтты. 

Марат Жыланбаев — әлемдегі 4 шөлді кесіп өткен алғашқы әрі жалғыз марафоншы. Ол Азиядағы Қарақұм шөлінің 1200 шақырымын 20 күнде кесіп өтсе, дүниежүзіндегі ең үлкен шөл Сахараның 1700 шақырымын 24 күнде жүріп өткен.

Еске сала кетейік, Марат Жыланбаев туралы фильм Алматыда тағы да көрсетілмейтін болды.