Трамптың арнайы өкілі мен АҚШ мемлекеттік хатшысының орынбасары Қазақстанға келді

АҚШ президенті Дональд Трамптың Оңтүстік және Орталық Азия жөніндегі арнайы өкілі Серджио Гор және мемлекеттік хатшысының орынбасары Кристофер Ландау Қазақстанға ресми сапармен келді, деп хабарлайды Orda.kz.

Ақорданың мәліметінше, сапар барысында қазақ-америкалық қатынастардың болашағы, сондай-ақ халықаралық және өңірлік мәселелер талқыланатын кездесулер өткізіледі.

«Алматыға АҚШ президентінің Оңтүстік және Орталық Азия жөніндегі арнайы өкілі Серджио Гор мен мемлекеттік хатшысының орынбасары Кристофер Ландау келді. Сапар бағдарламасында қазақ-америкалық қатынастардың болашағы, сондай-ақ халықаралық және өңірлік күн тәртібіндегі мәселелер талқыланатын бірқатар кездесулер жоспарланған», деп хабарлады Ақорда.

Сонымен қатар, делегация қазіргі заманғы өнер мұражайында, Шымбұлақ тау-шаңғы курортында және Медеу мұз айдынында болды. Қонақтарды Президент әкімшілігінің басшысы Айбек Дәдебай қарсы алды.