Тоқаев жаңа Конституцияны іске асыруға қатысты Жарлыққа қол қойды

Президент Қасым-Жомарт Тоқаев «2026 жылғы 15 наурызда қабылданған Қазақстан Республикасының Конституциясын іске асыру жөніндегі шаралар туралы» Жарлыққа қол қойды, деп хабарлайды Orda.kz.      

Президент 2026 жылғы 15 наурызда республикалық референдумда қабылданған Қазақстан Республикасы Конституциясының мәтінін Egemen Qazaqstan және Казахстанская правда мерзімді баспасөз басылымдарында жариялауды тапсырды.

«1995 жылғы 30 тамызда республикалық референдумда қабылданған Қазақстан Республикасының Конституциясының түпнұсқасы Қазақстан Республикасы Президентінің архивіне сақтауға тапсырылсын. Қазақстан Республикасының Конституциясының түпнұсқасы Қазақстан Республикасының Президентінде сақталатыны белгіленсін» деп жазылған Жарлықта.

Референдумның орталық комиссиясына  Қазақстан Республикасы Конституциясының мәтінін Қазақстан Республикасы Әділет министрлігінің шаруашылық жүргізу құқығындағы республикалық мемлекеттік кәсіпорны — Қазақстан Республикасы Заңнама және құқықтық ақпарат институтына жолдауды қамтамасыз ету тапсырылды.

Бұл мәтін Қазақстан Республикасының нормативтік құқықтық актілерінің эталондық бақылау банкінде орналастырылады.

Қазақстан Республикасы президентінің заң шығару бастамасы тәртібімен Қазақстан Республикасы Парламенті Мәжілісінің қарауына мынадай заң жобалары енгізіледі:

• «Қазақстан Республикасының Президенті туралы» конституциялық заң жобасы;
• «Қазақстан Халық Кеңесі туралы» конституциялық заң жобасы.
   

Мемлекет басшысы Қазақстан Республикасы президенті Әкімшілігіне мүдделі мемлекеттік органдармен бірлесіп, осы Жарлықтың 5-тармағында көзделген заң жобаларын әзірлеу және оларды Қазақстан Республикасы президентінің қарауына енгізуді қамтамасыз етуді тапсырды. 

Қазақстан Республикасы үкіметінің заң шығару бастамасы тәртібімен Қазақстан Республикасы Парламенті Мәжілісінің қарауына мынадай заң жобалары енгізіледі:

• «Қазақстан Республикасы астанасының мәртебесі туралы» конституциялық заң жобасы;
• «Қазақстан Республикасының әкімшілік-аумақтық құрылысы туралы» конституциялық заң жобасы.
   

Президент Қазақстан Республикасының Үкіметі, орталық және жергілікті мемлекеттік органдары нормативтік құқықтық актілерді Қазақстан Республикасының Конституциясына сәйкестендіру бойынша қажетті шараларды қабылдауды тапсырды.

Мемлекет басшысының тапсырмасымен Қазақстан Республикасының Үкіметі 2026 жылғы 7 сәуірге дейін Қазақстан Республикасы Конституциясын насихаттау жоспарын бекітетін болды.

Осы Жарлықтың орындалуын бақылау Қазақстан Республикасы Президентінің Әкімшілігіне жүктеліп,
Жарлық қол қойылған күнінен бастап күшіне енеді.

Оқи отырыңыз: 

• Тоқаев: «Тағдыршешті сәтке куә болдық»
• Ата заңға Халық Кеңесіне арналған жеке бөлім енгізу ұсынылды
• Қазақстанның Ата заңы Гималайдағы Айленд шыңын бағындырды