Тоқаев Трамптың реформасын қолдады

Қасым-Жомарт Тоқаев АҚШ президенті Дональд Трамптың әкімшілігі жүргізген реформалар мен олардың салдарына қатысты пікір білдірді, деп хабарлайды Orda.kz.

Тоқаевтың айтуынша, президент Трамптың басшылығымен қазіргі АҚШ әкімшілігі ауқымды заңбұзушылықтарды әшкерелеу, «терең мемлекеттің» саяси екіжүзділігін ашу және дәстүрлі моральдық құндылықтарды қалпына келтіру бағытындағы жұмысты қолдауға лайық. Бұл туралы Қасым-Жомарт Тоқаев мәлімдеді.

«Көп елде ондаған жылдар бойы «демократиялық моральдық құндылықтар» деген түсінік, оның ішінде ЛГБТ идеялары насихатталды. Осы ұранның астарында халықаралық үкіметтік емес қорлар мен ұйымдар біраз елдің ішкі істеріне өрескел араласты. Ақырында бәрі өте қарапайым болып шықты – миллиардтаған қаражат талан-таражға түсті. «Прогресс пен демократия», «адам құқықтары», «баспасөз бостандығы», «жемқорлықпен күрес» деп жүргендердің жеке капиталы олардың ресми жалақысымен үйлеспейді. АҚШ-та жасалған кез келген іс бүкіл әлемге тікелей әсер ететіні баршаға белгілі», – деді президент Тоқаев.

Қазақстан әрдайым тарихи, дәстүрлі және заманауи құндылықтардың тепе-теңдігін сақтауды басты назарда ұстады. Саяси прагматизмге шақырды.

«Қазіргі әлемдік оқиғалар біздің бағытымыздың дұрыстығын көрсетті. Әрине, шетелде болып жатқан жағдайларды ескерген жөн, бірақ біз ең алдымен өз ішкі күн тәртібімізге сүйенуіміз керек. Ұлттық мүддені қорғау үшін алдағы уақытта да прагматикалық әрі рационалды әрекет етуіміз қажет», – деп түйіндеді Тоқаев.