Тоқаев Telegram мессенджерінің негізін қалаушы Павел Дуровпен кездесті

Мемлекет басшысы Telegram мессенджерінің негізін қалаушы Павел Дуровпен кездесті, деп хабарлайды Orda.kz.

Digital Bridge 2025 халықаралық форумы алаңында Қасым-Жомарт Тоқаев Telegram мессенджерінің негізін қалаушы Павел Дуровпен кездесті. 

«Әңгімелесу барысында білім беру, жасанды инттелект және киберқауіпсіздік салаларындағы ынтымақтастық мәселелері талқыланды»,  деп мәлімдеді Ақорданың баспасөз қызметі. 

Айта кету керек, бүгін «Alem.ai» халықаралық жасанды интеллект орталығы өз жұмысын бастайды.

Бұл кездесуде Тоқаев Қазақстанның цифрлық дамуына үлес қосқан Telegram мессенджерінің қызметіне жоғары баға берді. Компания ресми түрде Astana Hub кластерінің қатысушысы атанды. Қазақстанда кеңсесін ашып, AIem.АІ орталығында ЖИ-зертханасын іске қосты. 

«Павел Дуров Қасым-Жомарт Тоқаевқа жасанды интеллект саласында бірлескен жобаларды жүзеге асыру перспективасы туралы мәлімет берді», деп мәлімдеді Ақорданың баспасөз қызметі. 

Еске сала кетсек, 2024 жылы Павел Дуров Францияның Париж Ле Бурже әуежайында ұсталған еді. TF1 хабарлауынша, Дуровтың ұсталуына Telegram-да модерацияның болмауы және кәсіпкердің заңсыз контенттің таралуын анықтау және жолын кесуде француз құқық қорғау органдарымен ынтымақтастықтан бас тартуы себеп болған.