Тоқаев Qarmet металлургиялық комбинатына барды

Қасым-Жомарт Тоқаев Қарағанды облысына жасаған жұмыс сапарында жылына 3,8 миллион тонна шойын өндіретін Теміртау қаласындағы Qarmet металлургиялық комбинатына барды.

Бұл туралы Ақорда хабарлады.

«Qarmet» акционерлік қоғамы Директорлар кеңесінің төрағасы Андрей Лаврентьев пен кәсіпорынның бас директоры Вадим Басин өндірісті дамытудағы жоспарларымен бөлісті. Алдағы жобаларды орындау мақсатында 3,5 миллиард доллардан астам қаржы қарастырылып отыр. Бұдан бөлек 500 миллион доллар шамасында көмір және 978 миллион доллар көлемінде темір рудасын өндіруге қосымша инвестиция құю жоспарланды.

«Біз отандық инвесторды шақыру арқылы дұрыс шешім қабылдадық. Олар бірден іске кірісті. Комбинаттағы жағдай бұрынғымен салыстырғанда айтарлықтай жақсарған. Бірақ мұнымен шектелуге болмайды. Ең басты міндет – Qarmet кәсіпорнының баяғы даңқын қайтарып, әлеуметтік мәселелерді шешуге баса мән беру. Бұл бағыттағы жұмыс басталып кетті. Одан хабардармын. Мен комбинатқа жыл сайын келіп, оның даму барысымен танысып тұрамын», – деді Қасым-Жомарт Тоқаев.

 «Qarmet» акционерлік қоғамында 34 мыңнан астам жұмысшы еңбек етеді. Металлургиялық комбинаттың өндірістік қуаты жылына 5,3 миллион тонна болат өндіруге жетеді. Былтыр кәсіпорын 2,9 миллион тонна дайын өнім шығарған. Оның 2,1 миллион тоннасы Ресей, Қытай, Өзбекстан, Қырғызстан, Тәжікстан, Түрікменстан, Грузия, Әзірбайжан және Ауғанстан елдеріне экспортталды.

Сонымен қатар, Андрей Лаврентьев  іске асырылып жатқан жобалар компанияның «5-9-5» бағдарламасының орындалуына болжам жасауға мүмкіндік береді деп айтты.

«Қабылданған стратегияға сәйкес кәсіпорын 2028 жылға қарай жылына 5 миллион тонна болат шығаруды, 9 миллион тонна көмір және 5 миллион тонна темір рудасы концентратын өндіруді жоспарлап отыр. Бұл 2023 жылғы көрсеткіштермен салыстырғанда орта есеппен 66 пайыз өсімді қамтамасыз  етеді», – деді Лаврентьев.