Тіл тағдыры – ел тағдыры: Қырғыз тілін білмейтін қырғызстандықтар айыппұл арқалайды

Қырғызстанда қырғыз тілін білмейтін азаматтарға айыппұл салу мәселесі бойынша заңнамаға өзгерістер енгізілді, деп хабарлайды Orda.kz.

24.kg басылымының дерегінше, Жогорку Кенеш екінші және үшінші оқылымда мемлекеттік тілдің қолданысына қатысты бірқатар өзгерісті мақұлдаған.

Енді мемлекеттік тілді білу — депутаттар, министрлер, түрлі деңгейдегі судьялар мен прокурорлар, тергеушілер, Ұлттық банк, қауіпсіздік және құқық қорғау органдары қызметкерлері үшін міндетті талапқа айналады. Сондай-ақ, адвокаттар мен нотариустар қырғыз тілін тиісті деңгейде меңгермесе, лицензия ала алмайды.

Сонымен қатар, егер шетелден келген азамат қырғыз тілін күнделікті өмірге жеткілікті деңгейде білмесе, оған ықтиярхат немесе иммигрант мәртебесі берілмеуі мүмкін.

Жаңа талаптар медиа саласын да қамтиды. Бұдан былай теле-радио өнімдерінің кемінде 60 пайызы қырғыз тілінде болуы тиіс. Ал жарнама мәтіндері орфография мен тіл нормаларына сай жазылып, жергілікті билік тарапынан мақұлдануы қажет.

Жаңа нормаларды бұзғандарға айыппұл салынады: қарапайым азаматтар үшін — 5 000 сом (шамамен 29 500 теңге), ал заңды тұлғалар үшін — 17 000 сом (шамамен 100 500 теңге).

Бұл талаптардың орындалуын Қырғызстанның Мемлекеттік тіл және тіл саясаты жөніндегі ұлттық комиссиясы қадағалайды.

Айта кетейік, СҚО-да жүкті әйел орыс ұлтына тіл тигізгені үшін екі жылға сотталды.