Тікелей эфирде қазақ ұлтына тіл тигізген Қостанай тұрғыны cотталды

Tik Tok-та тікелей эфирде қазақ халқына тіл тигізген Қостанай тұрғыны бас бостандығынан айырылды, деп хабарлайды Orda.kz.

Қостанай қаласындағы №2 сотта 44 жастағы қала тұрғыны Қылмыстық кодексінің 174-бабы 1-бөлігі бойынша кінәлі деп танылды. Іс материалдарына сәйкес, 2024 жылдың қараша айында түнгі сағат 03:45-те айыпталушы мас кезінде TikTok әлеуметтік желісіне кіріп, жеке аккаунты арқылы тікелей эфирге қосылған. Қорғаушысы Валерий Ли эфир барысында Ресей мен Украина арасындағы соғыс тақырыбы талқыланғанын түсіндірді.

Tobolinfo мәліметінше, тікелей эфир кезінде Юлия Хон қазақ ұлтына қатысты балағат сөздер қолданып, пікірталасқа қатысушыларды ұлттық белгісі бойынша қорлайтын мәлімдемелер жасаған. 

Сот үкімімен Юлия Хон екі жылға бас бостандығынан айырылып, ең төмен қауіпсіздік деңгейіндегі түзеу мекемесіне жіберілетін болды. Хон сот залында бірден қамауға алынды. Бұдан бөлек, сот оны 826 мың теңге көлеміндегі процессуалдық шығындарды өтеуге міндеттеді. Сот жаза тағайындау кезінде жеңілдететін мән-жайларды да ескерді.

Ал қорғаушы Валерий Ли тікелей эфир барысында оның қорғауындағы азаматшаның өзі де қорлау сөздер естігенін, сондай-ақ айтылған пікірлер тұтас бір ұлтқа емес, нақты бір адамға бағытталғанын алға тартты.

Қорғау тарапы үкіммен келіспейтінін білдіріп, оны апелляциялық тәртіпте шағымдайтынын мәлімдеді.

Еске салсақ, 8 қаңтар күні Қарағандыда полиция департаментінің ұйымдасқан қылмысқа қарсы күрес басқармасының жедел қызметкерлері прокуратурамен бірлесіп қылмыстық топты ұстады. Күдіктілер жәбірленушілердің әлеуметтік жағынан осал санаттағы азаматтарға арналған арнайы мемлекеттік төлемдерін алып келген.