Теракт пен соғысқа үгіттеген екі қазақстандық 9 жылға сотталды

Теракт пен соғысқа үгіттеген Ақтөбе облысының және Қаскелең қаласының тұрғыны ұсталды, деп хабарлайды Orda.kz.

Ақтөбе облысында тұратын ер адам жұртты лаңкестік топтарға қосылуға үгіттеп, үйінде өте көп қару сақтағаны үшін 9 жылға сотталды. Оның үйінен екі автомат, сегіз тапанша, мылтықтар, алты рация, көз жасаурататын заттар, граната және 500-ден астам оқ-дәрі табылды. Ер адам өзгелерді содырларға қосылуға үгіттеп қана қоймай, өзі де солардың қатарына қосылмақ болған.

Сонымен қатар, Қаскелең қаласының тұрғыны да 9 жылға сотталды. Ол теракт жасамақ болып, ел ішінде ұйым құруға тырысып, өзгелерге радикалдардың идеологиясын насихаттаған.

«Алматы облысының сот шешімімен терроризмді насихаттағаны және лаңкестік әрекет ұйымдастырғаны үшін адамдарды үгіттеп, қоспақ болғаны үшін Қаскелең қаласының тұрғындарының бірі 9 жылға бас бостандығынан айырылды. Тергеу деректеріне қарасақ, ол Қазақстан аумағында терактілер жасау үшін лаңкестік топ құруды жоспарлады. Осы мақсатта өзге діндар азаматтарға терроризм идеологиясын тықпалап, оларды өз қатарына қосуға тырысқан»,  деп мәлімдеді полиция.