Темекі өнімдері тағы да қымбаттайды

Қазақстанда темекі өнімдерінің ең төменгі бағасы одан әрі көтерілетіні белгілі болды, деп хабарлайды Orda.kz.  

ҚР Қаржы министрлігінің «Сүзгісі бар және сүзгісіз темекіге, папиросқа, сигараға және қыздырылатын темекі өнімдеріне ең төменгі бөлшек сауда бағаларын белгілеу туралы» бұйрығына енгізілетін өзгерістер жобасының сипаттамасында келесідей жазылған:

«Жобаның мақсаты – сүзгісі бар және сүзгісіз темекіге, папиросқа, сигараға және қыздырылатын темекі өнімдеріне ең төменгі бөлшек сауда бағаларын арттыру. Ұсынылып отырған өзгерістер темекі өнімдеріне қатысты салмақты салық және баға саясатын іске асыруға бағытталған. Бұл өзгерістерді жүзеге асыру арқылы Қазақстан Республикасында темекі мен темекі шегудің таралуын және қолданылуын тұрақты түрде азайтуға бағытталған денсаулық сақтау саласындағы мақсаттарға қол жеткізу көзделеді». 

Таң қаларлығы, құжаттың өзі сайтта ашылмайды, яғни темекі өнімдерінің жаңа ең төменгі бағасы қандай болатыны белгісіз.

Еске салайық, 2025 жылдың 1 қаңтарынан бастап Қазақстанда темекінің ең төменгі бөлшек сауда бағасы 5,3% -ға өсіп,   870 теңге болды.