Тасқын кезінде жарылған су қоймасына жауапты 75 жастағы кәсіпкер сотталды

Хромтау аудандық сотында Мағаджан су қоймасын сенімгерлік басқаруға алған кәсіпкерге сот үкімі шықты, деп хабарлайды Orda.kz. 

Былтыр тасқын кезінде Мағаджан су қоймасы жарылып, адамдар эвакуацияланған. Сотталушы Мықтыбек Исмағамбетовке қылмыстық кодекстің 254 бабы бойынша айып тағылды.

Мәліметтерге сүйенсек, 1985 жылы Хромтау ауданы Табантал ауылынан 22 шақырым қашықтықта Мағаджан су қоймасы салынған. Хромтау аудандық қаржы бөлімі 2014 жылы су қоймасын «Тұлпар ТК» ЖШС-не сатып алу құқығынсын сенімгерлік басқаруға береді.

Келісімшарт бойынша серіктестік нысанды күтіп ұстап, жөндеп, уақытылы техникалық қызмет көрсетуі тиіс болған. Ал 2017 жылы Хромтау аудандық ауыл шаруашылығы бөлімі мен ЖШС арасында балық шаруашылығын дамыту туралы келісімшарт жасалады. 2024 жылы наурызда Ақтөбеде қар тез еріп, өзендерде су деңгейі көтерілді. Сондай-ақ Хромтау ауданындағы Мағаджан су қоймасында да дәл осындай жағдай тіркелді. 

Сот отырысы кезінде сотталушы М. Исмағамбетов өзіне тағылған айыппен келіспеді. Ол 2014 жылдан бастап күні бүгінге дейін бизнес жоспар және келісімшарт бойынша міндеттерін орындағанын, қажетті техника сатып алып, жыл сайын шлюзді қоқыстан тазартқанын, техникалық қызмет көрсеткенін айтты.

Сотталушы өз сөзінде 2018 жылы облыстық табиғи ресурстар басқармасына күрделі жөндеу туралы хат жазып, бірақ жауап болмағанын жеткізді. Сонымен бірге платинаның меншік иесіне құжаттарды реттеуге қатысты өтініш айтқан. 

Сот үкімімен Мықтыбек Исмағамбетов қылмыстық кодекстің 254 бабы бойынша айыпты деп танылып, 2 жыл 6 айға бас бостандығынан шектеу жазасын тағайындалды. Ол су шаруашылығы саласында 3 жыл жұмыс істей алмайды.