Тәліптер билігі Ауғанстанда ММА ойынына тыйым салды

Ауғанстанда тәліптер үшін тым қатал көрінген ММА-ға тыйым салынды. Бұл спорт түрі ислам дініне қайшы деп танылды, деп хабарлайды Orda.kz rmcsport.bfmtv.com сайтына сілтеме жасап.

Бұйрықты ізгілікті насихаттау және жамандықтың алдын алу министрлігінің моральдық полициясы бұл спорттың ислам заңына немесе шариғат заңдарына сәйкестігін тексергеннен кейін шығарды.

«Бұл спорт түрі шариғат тұрғысынан дұрыс емес, көптеген аспектілері бойынша ислам ілімдеріне қайшы келеді. Сондықтан Ауғанстанда аралас жекпе-жекке тыйым салу туралы шешім қабылданды», деп хабарлады Тәліптер үкіметінің спорт бөлімі.

Сондай-ақ бір спорт саласының шенеунігі «аралас жекпе-жек өнеріне ішінара тыйым салынды, өйткені онда зорлық-зомбылық тым көп болып саналады және жарақатқа немесе тіпті өлімге әкелуі мүмкін», - деп қосты.

ММА - күрестен дзюдоға немесе муай-тайға дейін көптеген пәндердің әдістері мен ережелерін біріктіретін жекпе-жек өнерінің экстремалды түрі екенін естеріңізге саламыз.

Бұған дейін Ауғанстанда әйелдерге көпшілік алдында дауыс шығарып сөйлеуге тыйым салынғаны хабарланған болатын. Тәліптер әйелдердің дауысын шығармауы туралы жаңа заң қабылдады.