Тәліптер әйелдерге арналған орындарға терезе салуға тыйым салды

Талибанның жоғарғы жетекшісі жаңа жарлық шығарды. Жарлықта әйелдер жиі болатын, қоғамдық орындарға қарайтын бөлмелерде терезелер cалуға тыйым салынды, деп хабарлайды Orda.kz.

AFP агенттігінің мәліметіне қарасақ, жаңа ережелер тұрғын үйлердің бәріне қатысты шығып отыр. Оларда «алаңға, асүйге, көршінің құдықтарына және әйелдер жиі болатын басқа жерлерге қарайтын терезелерді» орнатуға тыйым салынған. Талибан өкілі Забихулла Муджахидтің айтуынша, бұл шара әйелдерді бақылаудан туындайтын «әдепсіз әрекеттердің» алдын алу үшін қабылданған.

Егер жаңа ғимараттар бұл талаптарға сәйкес келмесе, үй иелеріне қабырға тұрғызуға немесе көруді бөгейтін басқа тосқауылдар қоюға міндеттеме беріледі. Осы ережелердің орындалуын жергілікті билік органдары мен басқа да құзырлы мекемелер бақылап отыратын болады.

2021 жылы Талибан билікке келгеннен бері Ауғанстандағы әйелдердің құқықтары қатты шектелді. Оларға мектепке баруға, жұмыс істеуге, саябақтар мен қоғамдық орындарға шығуға тыйым салынды. Біріккен Ұлттар Ұйымы бұл саясатты «гендерлік апартеид» деп атады.

Еске сала кетсек, Orda.kz бұған дейін осы Ауғанстанда тұратын қазақтарға хабарласып, сұхбат алған болатын.