Талғардағы қантөгіс: Прокурор басты айыпталушыны өмір бойы бас бостандығынан айыруды сұрады

Талғар маңындағы Қызыл-Қайрат ауылында болған адам өлтіру, екі жасар баланы ұрлау мен зорлау ісі бойынша сот процесі аяқталуға жақын. Прокурор 12 баппен сотталып жатқан негізгі күдіктіге өмір бойына бас бостандығынан айыру жазасын тағайындауды сұрады, деп хабарлайды Orda.kz.

Сотта жәбірленуші тараптың адвокаттары  Гаухар Сариева, Жандос Палманов және Асылбек Әбдірайымов прокурордың сұраған жазасына қосылатынын айтты. Қорғаушылардың айтуынша, басты айыпталушыға ең қатаң жаза өмір бойына бас бостандығынан айыру сұралған.

Осы іс бойынша сотталушылар қатарында отырған кәмелетке толмаған екі күдіктіге қатысты прокурор әрқайсысына 9 жылдан түрме жазасын тағайындауды ұсынды. 

«Топ болып алдын ала сөз байласу арқылы жасалған кісі өлтіру фактісі бойынша әр жасөспірімге 9 жыл, ал адам ұрлау эпизоды бойынша 7 жыл 6 ай жаза сұраған едік. Ал прокурор соттан кәмелетке толмағандарға түпкілікті 9 жыл бас бостандығынан айыру жазасын белгілеуді өтінді. Сонымен қатар, біз басты айыпталушыға өмір бақиға жазасынан айыру үкімі мен үш күдіктіден жалпы сомасы 60 млн моральдық шығын талап еттік», – деді Әбдірайымов.

Іс бойынша негізгі айыпталушыға Қылмыстық кодекстің 12 бабы бойынша айып тағылған:

1. 99-бап, 2-бөлік, 7-тармақ – «Адамдар тобы жасаған кісі өлтіру».
2. 125-бап, 3-бөлік, 2-1-тармақ – «Кәмелетке толмағанды тарту арқылы адам ұрлау».
3. 120-бап, 1-бөлік – «Зорлау».
4. 121-бап, 1-бөлік – «Күш қолдану арқылы сексуалдық сипаттағы әрекеттер».
5. 190-бап, 3-бөлік, 4-тармақ – «Адамдар тобы жасаған алаяқтық».
6. 147-бап, 5-бөлік – «Жеке өмірге қол сұқпау құқығын бұзу (жеке деректерді заңсыз тарату)».
7. 149-бап, 2-бөлік – «Тұрғын үйге заңсыз кіру».
8. 115-бап – «Адам өлтіремін деп қорқыту».
9. 287-бап, 3-бөлік – «Қаруды заңсыз жасау».
10. 288-бап, 1-бөлік – «Қаруды заңсыз сақтау».
11. 200-бап, 1-бөлік – «Ұрлау мақсатынсыз автокөлікті заңсыз иелену».
12. 132-бап, 4-бөлік – «Кәмелетке толмағанды қылмысқа тарту».

Кәмелетке толмаған екі айыпталушыға:

1. 99-бап – «Адамдар тобы жасаған кісі өлтіру»;
2. 125-бап – «Бала ұрлау».

Еске салсақ, қанды қылмыс 6 қыркүйекте Қызыл-Қайрат ауылында болды. Ер адам екі жасөспіріммен бірге бұрын қарым-қатынаста болған келіншектің ағасын көшеде атып кеткен. Артынша, оның екі жасар жиенін алып қашып кетеді. Оқиғаның мән-жайын мына репортаждан оқи аласыз.

Оқи отырыңыз:

• Жыры бітпеген Талғар полициясы: Қызды зорлаған күдіктіні босатып жіберіп, ағасын атып өлтірді

• Талғардағы қанды қылмыс: Күдіктінің анасы ұлын қылмысқа не итермелегенін айтты

• Талғардағы қанды қылмыстың құрбанын туыстары жер қойынына тапсырды