Таяу Шығыстағы қақтығыс салдарынан мұнай бағасы 200-300 долларға дейін көтеріледі

Таяу Шығыстағы қақтығыстың өршуі және Ормуз бұғазының жабылуы елеулі экономикалық сілкіністерге әкелуі мүмкін, атап айтқанда, мұнай бағасы барреліне 200-300 долларға дейін көтерілуі мүмкін. Бұл туралы Ирак сыртқы істер министрі Фуад Хусейн неміс әріптесі Йоханн Вадефулмен телефон арқылы сөйлескен кезде мәлімдеді, деп хабарлайды Orda.kz РБК-ға сілтеме жасай отырып.

Оның айтуынша, Ормуз бұғазының жабылуы Парсы шығанағы мен Ирактан күніне шамамен бес миллион баррель мұнай шығынына әкелуі мүмкін.

Вадефуль, өз кезегінде, Германия Ирактың қақтығысқа тартылуына жол бермеу үшін әріптестерімен бірлесе жұмыс істейтінін айтты.

Екі елдің СІМ басшылары Иран мен АҚШ арасындағы, сондай-ақ еуропалық елдермен Иран ядролық бағдарламасы бойынша келіссөздер процесін «шиеленісті төмендету жолындағы негізгі қадам ретінде» жалғастырудың маңыздылығын атап өтті.

 Тегеран Израильдің Иранның ядролық және әскери нысандарына соққысы басталғаннан кейін Ормуз бұғазының жабылғанын жоққа шығармады. Бұғаз арқылы әлемдік мұнайдың шамамен 20 пайызы және сұйытылған табиғи газдың әлемдік жеткізілімдерінің 30 пайызына дейін өтеді. Израильдің Иранға шабуылынан кейін Brent мұнайының бағасы 13 пайызға көтеріліп, барреліне 78,5 долларға жетті.

 Биылғы мамыр айында еліміздің Энергетика министрлігі ОПЕК + келісімі аясындағы әріптестермен ынтымақтастықты жоғары бағалайтынын және бұл форматты  әлемдік мұнай нарығының тұрақтылығын қамтамасыз етудің маңызды құралы деп санайтынын атап өтті.

Израиль Иранға жасаған әуе соққысымен Таяу Шығыстағы онсыз да күрделі жағдайды одан әрі ушықтырды. Дегенмен бұл шабуыл Қазақстанға күтпеген экономикалық пайда әкелді, осы тұрғыдағы сарапшы пікірін мына жерден оқыңыздар.