Таиланд пен Камбоджа уақытша әскери қақтығысты тоқтатты

Таиланд пен Камбоджаның қарулы күштері шекара маңындағы аймақтарда нөсер жауынға байланысты әскери қимылдарды уақытша тоқтатты. Дегенмен, екі тарап та өз позицияларын сақтап отыр, деп хабарлайды Orda.kz The Nation басылымына сілтеме жасап.

Осы арада Дональд Трамп Truth Social әлеуметтік желісінде Камбоджа мен Таиланд басшылығымен сөйлескенін мәлімдеді. Ол екі елдің келіссөздерге дайын екенін айтты.

«Екі тарап та атысты дереу тоқтатып, бейбітшілікті қалайды. Сонымен қатар олар АҚШ-пен сауда келіссөздерін қайта бастауға ниетті. Алайда біз бұл тек қақтығыс толығымен тоқтағаннан кейін ғана мүмкін деп есептейміз. Олар атысты тоқтату және түпкілікті бейбіт келісім туралы бірден кездесіп, келіссөз жүргізуге келісті (…) Бәрі аяқталған соң, мен екі елмен сауда қарым-қатынасын жалғастыруды асыға күтемін!» деп жазды АҚШ президенті. 

Бұған дейін Камбоджа мен Таиланд арасындағы өзара атқылау теңіз жағалауына дейін жақындағаны хабарланған болатын – бұл аймақта танымал курорттар орналасқан. Қақтығыс салдарынан ондаған адам қаза тапты.