«Сусыз отырмыз!»: Ақтаулықтар тағы да жолды жабуға мәжбүр болды

3 қыркүйек күні Ақтау қаласындағы 32 В ауданындағы «Шанырақ» тұрғын үй кешені тұрғындары үйлерінде су жоқ болған соң, наразылығын көрсетіп автомобиль жолын жауып тастады деп хабарлайды Orda.kz.

Кешкі сағат 20:30 шамасында олар №12 үйдің алдына жиналып, су тапшылығы мәселесін шешуді талап етті.

Әлеуметтік желілерде наразы халықтың бейнежазбасы тарап кетті. 

Наразылыққа жауап ретінде қала әкімдігі, прокуратура және «Каспий жылу, су арнасы» өкілдері тұрғындарға мән-жайды түсіндірді. Қала әкімдігі хабарламасында су тапшылығының себебі ОСЖТ-4  «КЖСА» МКК резервуарларындағы су деңгейін сақтау қажеттілігімен байланысты екенін түсіндірді. Бұл су қысымының жасанды түрде төмендеуіне әкеледі. Су беру қалыпты деңгейге 18:00-ден кейін қайтарылады.

Бұл оқиға Ақтауда бірінші рет болып жатқан жоқ.

Orda.kz биыл шілдеде Ақтауда ауыз сусыз отырғандар көшеге шығып, жолды жауып тастағаны жайлы жазған болатын.

Осындай қайталана беретін әр жағдайдан кейін билік өкілдері араласқан соң, жол қозғалысын қалпына келтіріп тұрғындарды таратып отырды. Бірақ су тапшылығы әлі де өзекті болып отыр.