Шыңжаңда жер сілкініп төтенше жағдай енгізілді

Қытай билігі сәрсенбі күні таңертең Шыңжаң-Ұйғыр автономиялық ауданында (ШҰАА) 5,2 магнитудалық жер сілкінісінен кейін төртінші деңгейдегі шұғыл ден қою режимін енгізді, деп хабарлайды Orda.kz  Синьхуа басылымына сілтеме жасап.

Қытайдың сейсмологиялық желілер орталығының мәліметінше, жер асты сілкіністері 7 қаңтарда жергілікті уақыт бойынша 03:17-де ШҰАА-ның Тасқорған-Тәжік автономиялық округінде тіркелген. Жер сілкінісінің ошағы 10 шақырым тереңдікте болды.

Оқиғаға байланысты ведомство ықтимал төтенше жағдайлар салдарын жою бойынша жұмысты өрістетуді тапсырды. Өңірлік бөлімшелерге сейсмикалық мониторингті күшейту, жағдайға бағалау жүргізу және деректерді уақтылы жаңартуды қамтамасыз ету тапсырылды.

Эпицентрден 10 шақырым радиустағы аумақ теңіз деңгейінен орташа биіктігі шамамен 4545 метр биік таулы ауданда орналасқан. Қазіргі уақытта қаза тапқандар немесе елеулі қираулар туралы ресми хабар жоқ.

Еске салсақ, былтырғы 4 желтоқсан күні  Алматыда жер сілкінді. Тұрғындардың айтуынша, дүмпулер «айтарлықтай сезілді».  Төтенше жағдайлар департаменті алдын ала магнитудасын «2–3 балл» деп бағалады.