Шығыс Қазақстан облысында толассыз жауған жаңбыр салдарынан үйлер суға батып жатыр

Шығыс Қазақстан облысының Алтай аймағында толассыз жауған жаңбыр салдарынан өзендер арнасынан асып кетті. Тұрғын үйлер мен іргелес аумақтар су астында қалды, деп хабарлайды Orda.kz порталы.

Төтенше жағдайлар министрлігінің мәліметінше, Бұқтырма өзеніндегі су деңгейінің көтерілуіне байланысты Зубовск ауылындағы бес тұрғын үй мен оған жақын орналасқан 20-дан астам учаскені су басқан. Тұрғындар көшіруден бас тартып, туыстарына қоныстанған.

«Көкте ұшып жүріп көзбен шолу жұмыстары жүргізіледі. Семей мен Өскеменнің ТЖ қызметкерлері мен әскерилер елді мекендерге профилактикалық жұмыстар жүргізуге шықты. Олар су ағызу үшін арнайы техника әкелді», - деп хабарлады Төтенше жағдайлар министрлігі. 

Коробиха өзенінде де су деңгейінің көтерілуі байқалды. Катонқарағай ауданындағы ауылдардың бірінде де бірнеше ауланы су басқан.