Шетелден қайтарылған 5,1 млрд теңге Қарағанды облысындағы су құбырын жаңартуға бағытталды

Қазақстан үкіметі Қарағанды облысында су құбыры желілерін салу және қайта жаңарту жұмыстарына 5,1 миллиард теңге бөлді, деп хабарлайды Orda.kz.

Қаражат арнайы мемлекеттік қорға шетелден қайтарылған заңсыз шығарылған активтер есебінен бөлінген.

«Мемлекет басшысының елді мекендерді сапалы ауызсумен қамтамасыз ету және инфрақұрылымды дамыту жөніндегі тапсырмасын орындау аясында арнайы мемлекеттік қордан Қарағанды облысындағы су құбыры желілерін салуға және жаңғыртуға 5,1 млрд теңгеден астам қаражат бөлінді. Жұмыстар шетелден елге қайтарылған заңсыз активтер есебінен қаржыландырылып отыр», — деп хабарлады Үкіметтің баспасөз қызметі.

Құрылыс және жөндеу жұмыстары Қарағанды қаласымен қатар, Тихоновка, Садовое, Колхозное, Актерек, Алихан ауылдары мен Көктенкөл станциясында жүргізіліп жатыр. Аталған елді мекендердегі сумен жабдықтау жүйелері ескірген, апат жиілеген және ауызсумен қамтамасыз етуде үзілістер болған.

Жергілікті әкімдік барлық жұмысты 2025 жылдың соңына дейін аяқтауды жоспарлап отыр.