Шенеуніктерді БАҚ-пен байланысуға, YouTube арқылы онлайн хабар таратуға және подкаст жазуға үйретеді

Осы мақсатта Астанада арнайы медиа-студия ашылды, деп хабарлайды Orda.kz.

Мемлекеттік қызмет істері агенттігі Мемлекеттік басқару академиясы базасында мемлекеттік қызметкерлердің медиа саласындағы біліктілігін шыңдайтын кеңістік ұйымдастырды.

«Заманауи медиа-студия жаңа технологияларды пайдалана отырып, мемлекеттік қызметшілерді оқыту әдістерін жетілдіруге, олардың пікірталас пен сұхбатта сөйлеу тәжірибесін шыңдауға және оларды іс жүзінде тиімді қолдану қабілетін арттыруға көмектеседі деп күтілуде» делінген ведомствоның баспасөз хабарламасында. 

Студияда Jalinga бейне және графикалық өнімдерін жазуға арналған автоматтандырылған жабдықтар орнатылып, оны YouTube, Zoom арқылы онлайн конференцияларға қосу және подкасттарды кәсіби жазу мүмкіндігімен жабдықталған.