Семейде оқушыны соққыға жыққан жасөспірімдердің аналары ата-ана құқығынан айырылады

Кәмелетке толмағандардың құқықтарын қорғау комиссиясы алтыншы сынып оқушысын аяусыз соққыға жыққан жасөспірімдерді мінез-құлқы қиын балаларға арналған арнайы мектепке жіберді. Екі ана ата-ана құқығынан айырылды, деп хабарлайды Orda.kz.

Тағы бес ана міндеттерін орындамағаны үшін кінәлі деп танылып, әрқайсысына 78 640 теңгеден айыппұл салынды. Жасөспірімдердің бірінің әкесі бес тәулікке қамауға алынды.

«Соттың мұндай шешім қабылдауына ішімдік ішу, бірнеше рет әкімшілік жауапкершілікке тартылу, нашақорлық пен полиция есебінде тұру, тәрбие бермеу т.б. жағдайлар себеп болды. Сонымен қатар, кәмелетке толмағандардың ата-аналарынан алимент пен мемлекеттік баж қаржысы өндірілді», — деді сот.

Ал баланы ұрып-соққан жасөспірімдердің алты ата-анасының үшеуі комиссия шешіміне қарсы шағым түсірді. Айта кетейік, бұған дейін Orda.kz оқушыны аямай ұрып, соққыға жыққан жасөспірімдерге қатысты соттың қандай үкім шығарғаны жайлы жазған еді.

Еске сала кетсек, Таразда 14 пен 16 жас арасындағы жасөспірімдер 12 жастағы қызды зорлағаны үшін 7 жыл 8 айға бас бостандығынан айырылды.