Референдум: Мүмкіндігі шектеулі жандар қалай дауыс береді?

Бостандық ауданында орналасқан №233 және №228 сайлау учаскелерінде тіркелген мүмкіндігі шектеулі азаматтар үшін дауыс беруді үйінде ұйымдастыру қалай қарастырылғанын Orda.kz тілшісі біліп қайтты.

Алматы қаласы Бостандық ауданындағы №233 сайлау учаскесінде түске қарай Қазақстанның жаңа Конституциясына дауыс беруге келген азаматтардың саны арта бастады. Учаскелік комиссияның мәліметінше, осы уақытқа дейін 225 адам дауыс беріп үлгерген. Бұл учаскеге тұрғылықты мекенжай бойынша барлығы 2498 адам тіркелген.

Сондай-ақ, осы учаскеге тіркелген төрт мүмкіндігі шектеулі азамат түскі сағат 12:00-ге дейін денсаулық жағдайына байланысты үйден дауыс беруге өтініш берген. Комиссия төрағасының айтуынша, өтініш білдіргендер арасында жүріп-тұруы қиын, мүгедектер арбасын пайдаланатын және көру қабілеті нашар азаматтар бар. Олардың үйіне екі комиссия мүшесі және бір бақылаушы барады.

Ал №228 сайлау учаскесінде таңертеңнен бері 175 адам дауыс берген. Бұл учаскеде жалпы саны 2438 сайлаушы тіркелген.

Жалпы, учаскелердің алдында патриоттық әндер қойылып тұр. Азаматтар өздерінің азаматтық борышын орындауға көбіне бала-шағасымен келіп жатыр. Кіреберісте келушілерге арналған тәттілер, тіске басарлар мен жылы шай ұсынылған, алайда олар ақылы.