Qaznews24 парақшасының авторы Темірлан Еңсебек 5 жылға сотталды

QazNews24 атты сатира парақшасының авторы Темірлан Еңсебекке сот үкім шығарды. Сот оны 5 жылға бостандығынан шектеу туралы шешім қабылдады, деп хабарлайды Orda.kz.

• Бес жыл бас бостандығын шектеу;
• Айғақтар (телефон мен ноутбук) мемлекет пайдасына тәркіленеді;
• 20 айлық есептік көрсеткіш айыппұл салынды.

Сондай-ақ, оған журналистік, құқық қорғаумен және саяси қызметпен айналысуға, волонтерлікпен және қайырымдылықпен айналысуға да бейбіт жиындарға қатысуға тыйым салынды.

Үкім заңды күшіне енген жоқ. Адвокаттың апелляцияға арыз беруіне 15 күн бар.

Бүгін, 11 сәуір күні Наурызбай аудандық сотында Темірлан Еңсебектің ісі қаралды. Сот процесі небәрі үш күнге созылып, қылмыстық іс бойынша тергеу аяқталды. Бүгін прокурор Темірлан Еңбесекті 5 жыл бостандығын шектеу айыруды сұраған еді. 

Судья Бейнегүл Кайсина Темірлан Еңсебекті ҚК 174 (Ұлтаралық араздықты қоздыру) бабына сәйкес кінәлі деп танып, 5 жыл бостандығын шектеу жазасын тағайындады.

Еске сала кетейік, 17 қаңтар Qaznews24 паблигінің авторы Темірлан Еңсебекке ұлтаралық араздық қоздырды деген айып тағылған болатын.

Сатира паблигінің авторы ұсталғанын желі қолданушылары да, белсенді азаматтар да қызу талқылады. Тіпті наразы болған белсенділер Алматыдағы Абай атындағы опера және балет театрының алдына плакат ұстап шықты.

19 қаңтар күні журналист әрі Art of Her журналының бұрынғы бас редакторы Руслан Бикетов жалғыз өзі пикетке шыққан еді. Оны полиция ұстап, 15 күнге қамады. 20 қаңтар күні шыққан журналист  Әсем Жәпішеваны да полиция ұстады. Ал 21 қаңтар күні «Oyan, Qazaqstan» қозғалысының мүшесі Ақмарал Жәкібаева да пикетке шықты. Оны да полиция ұстап әкетті. Дәл сол күні Темірлан Еңсебекке қолдау білдірген Сергей Зинченконы да полиция ұстап әкетті. 

Кеше өткен сотта да Темірлан Еңсебекті қолдап келген Айгүл Нұрболатова, Дархан Шәріпов, Ақторғын Ақкенжебаласы және Қонысбай Ырыскелдіні полиция ұстап, бөлімшеге жеткізді.